သိတဲ့အတိုင်းပဲ စာပေဗိမာန်ဆိုတာက ဘာသာပြန်စာပေအသင်းပေါ့ဗျာနော်။ စစချင်းလုပ်တဲ့ပုံစံက ကမ္ဘာ့ရဲ့ အသိပညာအတတ်ပညာတွေကို အင်္ဂလိပ်ဘာသာနဲ့ရှိရာကနေပြီးတော့ မြန်မာဘာသာကိုပြန်ဖို့ဆိုတဲ့ လုပ်ငန်းအနေနဲ့ လုပ်တာဗျ။ အဲဒီတော့ လုပ်ရင်းလုပ်ရင်းနဲ့ တခြားစာအုပ်စာတမ်းတွေ ထုတ်ဖို့ကိစ္စဘက်ကို ပြောင်းသွားတယ်။ စာပေဗိမာန်ရဲ့ မူလတာဝန်ဖြစ်တဲ့ မြန်မာဘာသာနဲ့ ပြန်ဖို့တဲ့အပိုင်းက နည်းနည်းလေး နောက်ပိုင်းမှာ လျော့သွားတယ်ပေါ့ဗျာ။ ဒါပေမဲ့ ကျွန်တော် အဲဒီရောက်ခါစအခြေအနေအထိကတော့ သိပ်ပြီးလျော့လှတယ် မရှိသေးဘူးဗျ။ စာရေးဆရာကြီးတွေလည်း ရှိသေးတယ်ဗျာ။ ဒေါ်ခင်မျိုးချစ်တို့၊ ဆရာမောင်ထင်တို့၊ စတဲ့ပုဂ္ဂိုလ်ကြီးတွေလည်း စာပေဗိမာန်မှာ ၀င်ပြီးတော့ ပါဝင်ဆောင်ရွက်နေကြတယ်။
ကျွန်တော်တို့တွေကို တာဝန်ပေးတဲ့နေရာမှလည်း ဥပမာ Charles Dicken ရဲ့ စာအုပ်တွေ တော်တော်များများကိုလည်း ဘာသာပြန်ဖို့ လုပ်တယ်ဗျ။ အဲဒီတော့ ကမ္ဘာ့စာပေပေါ့ဗျာ။ ဂန္ဓ၀င်စာပေတွေလည်း ဘာသာပြန်ဖို့လည်းလုပ်တယ်၊ အခြားသော သမိုင်းဆိုင်ရာတို့၊ သိပ္ပံဆိုင်ရာတို့၊ စသည့် အင်္ဂလိပ်စာပေကနေ ဗမာစာပေပြန်ရေးကိုပဲ တော်တော်အားထားပြီးတော့ တာဝန်တွေပေး၊ လုပ်လည်းလုပ်ကြ၊ အဲဒီမှာ ကျွန်တော် ဘာသွားတွေ့လဲဆိုတော့ ဘာသာပြန်တဲ့ အတတ်ပညာနဲ့ ပတ်သက်ပြီးတော့ တွေ့တာပေါ့ဗျာ။ အဲဒီတော့ ဘာသာပြန်တဲ့ အတတ်ပညာနဲ့ပတ်သက်လို့ ကျွန်တော် သိပ်ပြီးတော့ ပြောဖို့ရယ်လို့ ရည်ရွယ်ချက်မရှိပါဘူး။ ကျွန်တော် ပြောချင်တာက ဘာလဲဆိုတော့ ဘာသာပြန်တဲ့နေရာမှာ သူ့ရဲ့ ပါရမီ၊ အတတ်ပညာလေးကတော့ ရှိတာ အမှန်ပဲဗျ။ ဘာသာပြန်ရင်းပြန်ရင်း ဒါ နောင်ကျမှ သိတဲ့ဟာပေါ့ဗျာ။အဲဒီတော့ ဒီဘာသာပြန်တဲ့နေရာမှာ လူရဲ့ ကွာခြားချက်တွေ၊ စာတစ်ခုကိုဘာသာပြန်တာ အတူတူပဲ။ ဘာသာပြန်တာချင်းတူပေမဲ့လို့ တကယ်လက်တွေ့ ချပြီးတော့ ဘာသာပြန်တဲ့အခါကျတော့ တစ်ယောက်ပြန်တာနဲ့တစ်ယောက်ပြန်တာ မတူဘူး၊ ဟုတ်လား။ တစ်ယောက်ပြန်တဲ့ဟန်နဲ့၊ တစ်ယောက်ပြန်တဲ့ဟန် မတူဘူး။ တစ်ယောက်ပြန်တဲ့သဘောနဲ့ တစ်ယောက်ပြန်တဲ့သဘော မတူဘူး။ စတဲ့ မတူကွဲပြားမှုတွေကို သွားတွေ့တယ်ဗျ။ တွေ့ပြီးတော့ ကျွန်တော်အဲဒါတွေ ကြည့်ရင်းကြည့်ရင်းကနေပြီးတော့ ဘာသာပြန်တဲ့အလုပ်ကလည်း မလွယ်ပါလားလို့ တစ်ချက်တွေးမိတယ်။ တစ်ချက်ကလည်း ဘာသာပြန်တာ မလွယ်ရုံတင်မဟုတ်ဘူး၊ နဂိုမွေးရာပါ ဉာဉ်လေးလည်း ရှိလာမှကို ကောင်းနိုင်ပါလား၊ တူတူတန်တန် ဖြစ်နိုင်ပါလားဆိုတာကို သွားပြီးတော့ တွေးမိတယ်။ ဘာလို့ကျွန်တော်တွေးမိလဲဆိုတော့ ကျွန်တော်လည်း ဘာသာပြန်ပေါ့ဗျာ။ ၁၉၅၀ လောက်ကစပြီးတော့ ဘာသာပြန်တဲ့ အသက်မွေးတဲ့အလုပ်လို အတွေ့အကြုံတွေ ရှိနေခဲ့ပြီးတော့ လာခဲ့တဲ့လူဟာ အဲဒီကာလအပိုင်းပေါ့လေ၊ သို့မဟုတ်လို့ရှိရင်လည်း အဲဒီကာလရဲ့ နောက်အတော်ကြာတဲ့အပိုင်းတွေမှာ ဘာတွေသွားတွေ့လဲဆိုတော့ ဆိုပါတော့ဗျာ၊ တချို့လူတွေရဲ့ ဘာသာပြန်တွေ ဆရာမောင်ထင်၊ ဒါကတော့ ကျွန်တော်တို့ရဲ့ စံထားလောက်တဲ့ ဘာသာပြန်ဆရာကြီးပေါ့ဗျာ။ ထားတော့။ မောင်ထင်ရဲ့စာထက် ကျွန်တော်ဘယ်သူ့စာတွေ သွားတွေ့လဲဆိုတော့ ကျွန်တော်နဲ့ ရွယ်တူပေါ့ဗျာ၊ “မြသန်းတင့်”ရဲ့ စာတွေကို သွားပြီးတော့ တွေးမိတယ်ဗျ။ မြသန်းတင့် ဘာသာပြန်ချက်နဲ့ ဥပမာ- ကျွန်တော် ဆိုပါတော့ဗျာ တခြားလူတော့ မပြောတော့ပါဘူး။ ကျွန်တော်ပြန်တဲ့ ဘာသာပြန်ချက်ကို ကျွန်တော် တစ်ခါတလေ နှိုင်းယှဉ်ကြည့်တဲ့အခါကျတော့ တော်တော့်ကို ကျွန်တော့်အတွက်စိတ်ဓာတ်ကျတယ်၊ မြသန်းတင့်စာအတွက်တော့ ကျွန်တော် အံ့သြရတယ်ဆိုတာတွေကို သွားတွေ့တယ်ဗျ။ ကျွန်တော့်ရဲ့ဘာသာပြန်က ဘယ်လိုဖြစ်လဲဆိုတော့ ကျွန်တော့်ရဲ့ဘာသာပြန်က ရေထဲကို ခွေးတစ်ကောင်ချလိုက်တဲ့အခါမှာ ခွေးကူးကူးနေသလိုပဲ။ ယက်ကန်ယက်ကန်နဲ့ပေါ့ဗျာ။ ၀ုတ်ဝုတ်ဝုတ်ဝုတ်နဲ့ တစ်ခါတည်း လျှောက်ပြီးတော့ ယက်ပြီးတော့။ အဲ နောက်ဆုံးဘိတ် ဟိုဘက်ကမ်းရောက်ရင်လည်း ရောက်မယ်ပေါ့ဗျာ။ ဒီဘက်ကမ်းလည်း ပြန်ရောက်ရင်ရောက်မယ်၊ သို့သော် မြသန်းတင်တို့ ဘာသာပြန်တဲ့အခါကျတော့ ရေထဲကို မြွေတစ်ကောင်ချလိုက်သလိုပဲ။ အသာလေး ရှောခနဲရှောခနဲ လိုရာကိုလည်းရောက်သွားတယ်၊ လှလှပပလေးလည်း ရောက်သွားတယ်။ သေသေသပ်သပ်ကလေးလည်း ရောက်သွားတယ်။ ဆိတ်ဆိတ်ငြိမ်ငြိမ်လေး၊ သက်တောင့်သက်သာလေးလည်း ရောက်သွားတယ်။ ဟုတ်လား သူလည်း ကျွန်တော်နဲ့အသက်အတူတူပဲ။ တက္ကသိုလ်ရောက်တာလည်း အတူတူပဲ။ အင်္ဂလိပ်ဘာသာတို့ ဘာတို့ညာတို့လည်း ဟုတ်လား၊ သူလည်း ဘာသာပြန်လုပ်ငန်းတွေလုပ်တယ်၊ ကျွန်တော်လည်း ဘာသာပြန်လုပ်ငန်းတွေ လုပ်တယ်။ သို့သော်လည်း သူ့မှာ သူက ပါရမီရှိတဲ့လူဆိုတဲ့အခါကျတော့ သူ့ရဲ့ဘာသာပြန်တွေက မြွေလေးများ ရေထဲကိုကူးသလို၊ သပ်ရပ်လှပစွာပေါ့ဗျာ ရှောရှောရှူရှူဖြစ်သလို ကျွန်တော့်ဘက် ဘာသာပြန် တစ်ခါပြန်ကြည့်တဲ့အခါကျတော့ တစ်ခါတလေ စိတ်ဓာတ်တောင်ကျတယ်ဗျာ။ သြော် ... ငါ့ ခွေးကူးကူးသလို ဖြစ်နေပါလားလို့။ ဒါကျွန်တော် ဘာသာပြန်အသင်းမှာ ကျွန်တော်လုပ်ခဲ့တဲ့ ကာလ အစပိုင်းမှာထဲက ကျွန်တော် စပြီးတော့ သတိထားမိတာပေါ့ဗျာ။ အဲဒီအချိန်တုန်းကတော့ မြသန်းတင့်စာတွေနဲ့ ကျွန်တော့်စာတွေနဲ့ နှိုင်းယှဉ်ခြင်းဆိုတဲ့ သဘော၊ ဟုတ်ချင်မှဟုတ်မယ်ပေါ့ဗျာ။ ဆိုပါတော့ ဆရာကြီးမောင်ထင်ရဲ့ ဘာသာပြန်တွေနဲ့ ကိုယ့်ဘာသာပြန်ကို နှိုင်းယှဉ်မိတယ်။ ဒေါ်ခင်မျိုးချစ်ရဲ့ ဘာသာပြန်တွေနဲ့ နှိုင်းယှဉ်မိတဲ့အခါတွေရှိတယ်။ စာရေးဆရာ ထင်လင်းရဲ့ ဘာသာပြန်တွေနဲ့ နှိုင်းယှဉ်မိတဲ့ အခါတွေရှိတယ်။ အဲဒီအခါမှာ ဘာသာပြန်တဲ့အတတ်ပညာအပေါ်မှာ ကျွန်တော့်ရဲ့ ဆင်ခြင်သုံးသပ်ချက်တွေ ရရှိတယ်လို့ ကျွန်တော်အဲလို ပြောနိုင်ပါတယ်။
အဲဒီမှာ ဘာတစ်ခု ကြုံကြိုက်လာလဲဆိုတော့ စာပေဗိမာန်က အဲဒီအချိန်တုန်းက စွယ်စုံကျမ်းတို့ဘာတို့ အဲဒါတွေက အင်္ဂလန်မှာ ရိုက်တယ်ဗျ။ နှစ် (၅၀) စာစဉ်တို့ လူထုသိပ္ပံ ဆိုတဲ့ စာအုပ်တွေကို နယ်သာလန်နိုင်ငံပေါ့ဗျာ၊ အဲဒီက ကုမ္ပဏီတစ်ခုနဲ့ ဆက်သွယ်ပြီးတော့ စာအုပ်တွေကို ဟော်လန်မှာ သွားပြီးတော့ ရိုက်တယ်ဗျ။ အဲဒီကုမ္ပဏီရဲ့နာမည်က ဂျမ်ဘာတန်လို့ ခေါ်တယ်။ အင်ဒိုနီးရှားစကားလုံးဗျ။ ဗမာလိုဆိုရင်တော့ “ပေါင်းကူးတံတား” နော်။ ဂျမ်ဘာတန်ဆိုတဲ့လုပ်ငန်း ရှိတယ်။ အဲဒီကုမ္ပဏီကနေပြီးတော့ ဗမာစာအုပ်တွေအပေါ်မှာ ကြီးကြပ်ဖို့ကွပ်ကဲဖို့ပေါ့ဗျာ၊ သို့မဟုတ်လည်း အကြံဉာဏ်တွေပေးဖို့။ သူတို့ကိုယ်တိုင်ကလည်း စာအုပ်တွေထုတ်ဦးမှာ ဆိုတဲ့အခါကျတော့ အယ်ဒီတာတစ်ယောက်လည်း လိုချင်တယ်ဆိုပြီးတော့ ခေါ်တဲ့အခါကျတော့ ကျွန်တော်လျှောက်တော့ ကျွန်တော်ရတယ်ဗျ။ အဲဒါက ၁၉၅၄ ခုလောက်ပေါ့ဗျာနော်။ ဟော်လန်ကို သွားဖြစ်တယ်ပေါ့ဗျာ။ အဲဒီ ဂျမ်ဘာတန်ဆိုတဲ့ကုမ္ပဏီရဲ့ နာမည်လေးကလည်း စိတ်ဝင်စားစရာဗျာ။ နည်းနည်းပြောရဦးမယ်။ ဂျမ်ဘာတန်ရဲ့နာမည် “ပေါင်းကူး” ပေါ့ဗျာ တံတားလို့ အဓိပ္ပာယ်ရသော်လည်း ဗမာလိုစာအုပ်တိုက်ရဲ့နာမည်ကို ဖော်ပြတဲ့အခါကျတော့ “သမ္မာမိတ္တ” ဆိုတဲ့ နာမည်နဲ့ ဖော်ပြတယ်ဗျ။ ဆိုတော့ အဲဒီကုမ္ပဏီက ဘာဖြစ်လို့ ဂျမ်ဘာတန်ဆိုတဲ့နာမည်ကို ခံလဲဆိုတဲ့အခါကျတော့ သူတို့က တော်လှန်ရေးသမားတွေလုပ်တာဗျ။ နာဇီတော်လှန်ရေးတွေကိုလုပ်တဲ့ တော်လှန်ရေးသမားတွေကနေ ခေါင်းဆောင်ပြီးတော့ စစ်ပြီးခါစမှာ ကုမ္ပဏီတစ်ခု ထောင်တယ်။ ကုမ္ပဏီထောင်တဲ့နေရာမှလည်း သူတို့ရဲ့ လက်အောက်ခံဖြစ်တဲ့ အင်ဒိုနီးရှားမှာ သွားပြီးတော့ အခြေစိုက်တယ်။ အဲဒါကြောင့် ဂျမ်ဘာတန်ဆိုတဲ့ ဒီအင်ဒိုနီးရှားစကားလုံးကို ယူတယ်ပေါ့ဗျာ။ ကျွန်တော်က အကြံပေးအယ်ဒီတာ တစ်ယောက်အနေနဲ့ သုံးနှစ်လောက် လုပ်ခဲ့တယ်ပေါ့ဗျာ။ အဲဒီကုမ္ပဏီကနေ စာပေဗိမာန်က ပုံနှိပ်တဲ့ နှစ် (၅၀) စာစဉ်တို့၊ လူထုသိပ္ပံတို့ဆိုတဲ့ စာအုပ်တွေကိုပုံနှိပ်တာ၊ အပြင်ကို ဗမာစာအုပ်တွေ တော်တော်များများ....။
0 comments:
Post a Comment